Puisi Bali Purwa ( Tradisional )
Ring Bali tembang taler kabawos sekar, sane kaperang dados petang soroh, luire : Sekar Rare, Sekar Alit , Sekar Madia miwah Sekar Agung.
1. Sekar Rare ( Gegendingan )
Sekar rare puniki nenten madue uger-uger pastika sakadi wangun tembange siosan.
Upama : - Guak maling Taluh
- Meong-Meong
- Juru Pencar
2. Sekar Alit / Macapat / Pupuh
Sekar Alit kawangun tur kaiket antuk uger-uger pada lingsa. Pada lingsa mateges :
kecap wanda miwah wangun suara ring panguntat sowang-sowang carik , miwah akeh carik sajeroning apada. Uger-uger kecap wanda jeroning sowang-sowang carik kabawos guru wilang(an)/pada, uger-uger wangun suara jeroning sowang-sowang carik kabawos guru dingdong/lingsa, uger-uger katah carik jeroning sowang-sowang pada kabawos guru gatra. Majeng ring sang maprakarsa malajah nyurat lan nembangang Sekar Alit , mangda pastika uning uger-ugere puniki mangda tembang sane karipta utawi katembangan patut lan becik.
Selanturipun, mangda elahan antuk nampenin, ring sor puniki pada lingsa:
No | Wastan Pupuh | Guru Gatra | Pada Lingsa |
1. | Maskumambang | 5 | 4a,8i,6a,8i,8a |
2. | Pucung | 6 | 4u,8u,6a,8i,4u,8a |
3. | Mijil | 6 | 3u,7i,6o,10e,10i,6i,8u |
4. | Ginanti | 6 | 8u,8i,8a,8i,8a,8i |
3. Sekar Madia ( Tembang Tengahan /Kidung)
Sekar madia kabanda antuk uger-uger wanda miwah labuh suara ring panguntating pamada. Napi mawinan kabawos Sekar Madia, riantukan tembange puniki wenten ring pantaraning Sekar Alit miwah Sekar Agung.
Upama :
Kidung Kawitan Wargasari, Kidung Wargasari, Kidung Malat .
4. Sekar Agung ( Wirama )
Sekar Agung utawi wirama inggih punika tembang sane kabanda antuk uger-uger : guru, laghu, wretta, matra, miwah gana.
Upama:
Wirama Mandamalon, Wirama Swandewi, Wirama Sronca
Indayang gendingang Pupuh-pupuh ring sor puniki!
Pupuh Pucung
1. Bibi anu,
Lamun payu luas manjus,
Antenge tekekang,
Yatnain ngaba masui,
Tiuk puntul
Bawang anggen pasikepan
2. Anak liu,
Bencana di marga agung
Bajang ulu bukal
Mangisep nyonyo ngulanting
Mangetekul,
Makrama tan pesu empehan
Pupuh Ginanti
1. Saking tuhu manah guru
Mituturin cening jani
Kaweruhe luir sanjata
Ne dadi prabotang sai
Kaanggen ngaruruh merta
Saenun ceninge urip
2. Ring sekolah genah ipun
Telebang janten kapanggih
Malajah seken-sekenang
Eda ja demen malali
Laline maarti engsap
Yen engsap mapuara kali
1 komentar:
Awokawokawok
Posting Komentar